Wanneer jy jou huis aan ‘n buitelander (nie-inwoner) verkoop.

Suid-Afrika bly ‘n gesogte bestemming vir oorsese eiendomkopers met ons wêreldklas-leefstyl, afgewaterde randwaarde, sterk eiendomsregistrasie en -regstelsel, en min beperkings teen nie-inwonende eiendomsbesit.

Dit is goeie nuus vir eiendomsverkopers in enige gebied wat gewild is onder buitelandse beleggers. Kusgebiede en ander toeriste-vriendelike gebiede sal veral aanklank vind by kopers wat 'n vakansie- of aftreebestemming wil hê, terwyl diegene wat vir beleggings- of besigheidsredes wil koop, 'n wyer fokus sal hê.

Onthou dat jy as die verkoper die reg het om die aktebesorger van jou keuse as prokureur aan te stel om die oordrag te hanteer en te registreer. Waarom afstand doen van hierdie voordeel? Jy behoort dit nie op te gee nie. Bespreek die aanbod deeglik met jou prokureur voordat jy die kontrak onderteken en kry so belangrike regsinsette rakende die voorgenome transaksie.

Kan 'n nie-inwoner dan jou huis koop?

Ja beslis - Suid-Afrika (anders as baie ander lande) stel min beperkings op nie-inwonende mense wat hier eiendom wil koop. Slegs “onwettige vreemdelinge” (buitelanders wat onwettig in Suid-Afrika is) word totaal van eienaarskap belet.

Daar is egter 'n paar aspekte waarvan beide jy en jou voornemende koper bewus moet wees -

• Watter wette en vereistes geld? Suid-Afrikaanse wetlike en regulatoriese vereistes geld en nie-inwoners moet plaaslike professionele advies inwin oor enigiets waarvan hulle nie seker is nie om onnodige vertragings te vermy en om 'n gladde verkoop- en oordragproses te verseker.
  
  
• Kan die koper in 'n entiteit koop? Ja dis moontlik, maar spesifieke reëls en belastingoorwegings geld wanneer 'n entiteit soos 'n maatskappy of trust die koper is - professionele advies is noodsaaklik. As verkoper moet jy ook weet dat dit moontlike vertragings in die oordragproses gaan meebring.
  
  
• Teken van dokumente: Die verkoopooreenkoms self kan op enige geografiese plek onderteken word en dit is geldig solank dit skriftelik en fisies onderteken is. Wanneer dit egter kom by die ondertekening van oordragdokumente vir latere indiening en gebruik in die Aktekantoor en ook die verbanddokumente vir die bank (indien 'n verband ter sprake is) moet die koper die dokumente verkieslik in Suid-Afrika onderteken. As dit nie moontlik is nie, kan die koper óf 'n plaaslike vertroude verteenwoordiger met 'n volmag aanstel, óf dokumente oorsee onderteken met behoorlike bekragtiging en attestasie aldaar (gewoonlik deur 'n notaris of by die ambassade of konsulaat, maar die vereistes verskil van land tot land).
  
  
• Koste: Oorsese kopers moet verstaan watter koste deur hulle betaalbaar is en moet veral die duurder uitgawes soos hereregte (of BTW indien van toepassing) in ag neem. Jou aktebesorger kan die voornemende koper help met 'n kosteberaming om enige kontantvloeikwessies en vertragings tydens die oordragproses te vermy.
  
  
• Verbandfinansiering: Suid-Afrikaanse banke bied verbandfinansiering aan nie-inwoners, gewoonlik onderhewig aan beide die banke se normale vereistes met betrekking tot bekostigbaarheid teenoor inkomste ensovoorts. Die banke werk ook in beginsel met 'n “50/50” limiet - die bedrag van die lening moet geëwenaar word deur 'n gelyke kontant betaling (gewoonlik deur die invoer van buitelandse fondse). Let daarop dat hierdie limiet slegs van toepassing is op nie-inwoners, dus buitelandse burgers wat reeds wettig in Suid-Afrika woon, kan, en dit verskil van bank tot bank, kwalifiseer vir groter verbande van tot 75%, selfs meer in sommige gevalle. Voldoening aan FICA (die Wet op Finansiële Intelligensiesentrum) sal identifikasie van die koper en bewys van woonadres vereis.
  
  
• Repatriasie van die fondse: Wanneer die nie-inwoner in die toekoms op sy beurt gaan verkoop, kan hy die ingevoerde buitelandse fondse en enige proporsionele wins repatrieer – oftewel terugneem na sy land van oorsprong. Die koper moet alle rekords hou wat verband hou met die oorspronklike aankoop en die "transaksiekwitansie" wat die invoer van fondse bewys.
  
  
• Watter inkomste- en kapitaalwinsbelasting is betaalbaar? Indien die eiendom verhuur word, is huurgeld onderhewig aan plaaslike inkomstebelasting. By herverkoop is KWB (Kapitaalwinsbelasting) van toepassing.