Ons raak formeel.

“Romeins-Hollandse reg”

Het jy al ooit gewonder waarom regsbeginsels soms in Suid-Afrika in Latyn of in Hollands (vandag Nederlands) gevind en uitgespreek word? Dit hou natuurlik direk verband met ons regsgeskiedenis en die ontwikkeling van ons regstelsel. Romeins-Hollandse reg was die ou Romeinse reg wat gedurende die sewentiende en agtiende eeu in Nederland toegepas is. Die regsbeginsels is in hierdie tyd van die Hollandse bewind in die Kaapse kolonie hier toegepas. Ons regstelsel het natuurlik in die eeue hierna verder ontwikkel, veral met die grootskaalse invoer van Engelse regsbeginsels toe ons deel van die “Empaaier” (die Britse Ryk) was en met die inbring van moderne wetgewing. Ons gemenereg bly egter steeds geanker in die Romeins-Hollands reg. Daarom sal ons howe van tyd tot tyd terugverwys na die oorspronklike Romeinse of Hollandse tekste en selfs die toepaslike beginsels in die Latynse of Hollandse frases direk aanhaal.   

 

Uit die HAT:

hofsaak s.nw. saak wat in ‘n geregshof dien; regsaak. 

hofsitting: s.nw. handeling/prosedure van ‘n geregshof by die verhoor van ‘n saak.

hofuitspraak:   amptelike/formele stelling/bevinding: vir of teen iemand uitspraak lewer. Die regter het haar uitspraak voorbehou en sal eers na die naweek ‘n bevinding maak. ‘n Duidelike, regverdige uitspraak.  Teen ‘n uitspraak appeleer.