Welvaartbeplanning oor geslagte heen - dink aan jou kinders en hulle kinders!

Jonas Salk, die ontdekker van die polio enstof het gevra  "Is ons goeie voorouers?"

Wat beplan jy om hierdie Feestyd vir jou gesin te gee? Dit is ‘n goeie tyd om verder te dink as die mooi en helder toegedraaide geskenke onder die boom. Dalk kan jy begin met 'n boedelplan wat jou geliefdes met die blywende geskenk van finansiële vryheid sal laat.

Boedelbeplanning behels meer as die opstel en ondertekening van 'n geldige testament, terwyl ons wel bevestig dat jou toepaslike testament altyd jou eerste prioriteit moet wees.

Maak jou testament die kern van jou boedelplan

Jou testament (“Laaste testament en wilsbeskikking”) kan heel moontlik die belangrikste dokument wees wat jy al ooit onderteken het. Sonder 'n testament laat jy geen aanwysings oor hoe jou boedel eendag verdeel en toegewys moet word nie. Jy verbeur die geleentheid om ’n eksekuteur te kies wat jy kan vertrou om jou boedel professioneel en doeltreffend af te handel. Ongeag jou ouderdom of toestand is dit nie iets om mee te wag nie.  Niemand kan voorspel wanneer ons laaste dag ter plaatse gaan aanbreek nie.

Die belangrikste is dat jou testament die kern van jou boedelplan moet vorm. As jy nog nie jou testament in plek het nie (of as jou testament opgedateer moet word), maak dit dan jou eerste prioriteit: “Maak 'n afspraak met my prokureur. Nou. ” Vra jou prokureur dan om jou testament op te stel en om dit die kern van jou algehele boedelplan te maak.

Wat is 'n boedelplan en hoekom moet jy een hê?

Jou boedelplan is jou roetekaart om welvaart te skep, om jou welvaart te beskerm en om dit later na die volgende generasie (of daarna) oor te dra. Dit is ‘n manier om jou eie gemaklike aftrede te beplan en te verseker en om voorsiening te maak vir die finansiële versorging van jou geliefdes nadat jy weg is.

Dit bevat jou algehele finansiële strategie, en beantwoord vrae soos hoe jy sal spaar en belê, watter beleggingsopsies jy sal kies, hoe jy bates sal verkry, hoe jy vir belasting en ander laste sal voorsien, hoe jy effektiewe opvolgbeplanning in jou besigheid sal toepas, hoe jy jou welvaart na die volgende generasie wil oordra ensovoorts.

Bring jou gesin vroeg in

Dit is nie maklik om jou eie sterflikheid te oorweeg nie, maar in regverdigheid teenoor jou geliefdes, maak seker dat sodra hulle oud genoeg is om deel te kan neem, almal aan boord en deel van die proses is. Insoverre jy gemaklik is daarmee, bring hulle in op jou beplanning, hou hulle op hoogte oor wat jy as belangrik beskou of wanneer jy daaraan dink om wesenlike veranderinge aan jou beplanning te maak.

Vrae om jouself af te vra

Ons is bekend met die gesegde: "As jy nie beplan nie, beplan jy eintlik om te misluk." Oftewel “Failing to plan is planning to fail”.

So kom ons beplan dan. Begin deur jouself (en jou gesin) hierdie vrae af te vra –

• Wat is ons einddoel?
  
  
• Wat is ons teikendatum om daardie doelwit te bereik?
  
  
• Hoeveel welvaart moet ons in ons leeftyd opbou?
  
  
• Hoe gaan ons dit bereik?

Formuleer nou jou finansiële missiestelling

Gebruik jou antwoorde op daardie vrae om 'n "finansiële missiestelling" en 'n gedetailleerde strategie te formuleer om daarby uit te kom. Soos altyd met doelwitstelling, verdeel jy die groot doelwitte in kleiner doelwitte, met teikendatums om dit te bereik en met maniere om jou vordering te monitor.

Dit is nodig en dit is die moeite werd om dit te doen. Daarna moet jy oorweeg hoe jy oor tyd daardie welvaart na die volgende generasie (of verder) kan oordra?

Bewaar jou welvaart vir die volgende generasie oor die lang termyn – en verder.

Vir baie van ons is dit realisties om vir een of twee generasies vooruit te beplan. Of jou mikpunt is om finansiële dekking te bied vir jou gade en jou kinders, of vir jou kleinkinders ook, of (kom ons mik hoog!) vir jou agterkleinkinders en verder, jou boedelplan moet dan  'n duidelike strategie uitlê om jou welvaart vir geslagte te bewaar.

Trusts word dikwels gebruik om welvaart oor generasies te bewaar en oor te dra.  Trusts moet met professionele advies oorweeg word en kan beslis 'n oplossing bied. Dit kan veral aangewend word om boedelbelastingbesparings oor baie generasies te verseker. Net so word korporatiewe strukture (maatskappye, maatskappy/trust kombinasies en so aan) dikwels vir hierdie doel gebruik, veral waar daar handelsondernemings betrokke is. Skenkings kan gedurende jou leeftyd gemaak word, maar wees bedag op die belastingimplikasies. Lewende annuïteite stel jou in staat om begunstigdes te nomineer om die voordele te ontvang (met 'n belastingaansporing vir hulle om ten minste 'n deel van die fondse na te laat). Daar kan ander toegepaste oplossings wees om by jou spesifieke behoeftes te pas.

Die benadering

Daar is heelwat besluite wat geneem moet word.  Daar is ook geen algemene oplossing nie. Elke gesin se situasie en behoeftes is uniek. Elke klas bate en elke manier om welvaart oor te dra en te bewaar het bepaalde vereistes en hou voordele, risiko's, koste- en belastingoorwegings in.

Hier moet jy en jou gesin professionele advies kry.