![](https://www.dotnews.co.za/Code//Uploads/Article/4747c41d-c0ff-4b75-9528-79175c908938.jpg)
Kontrakteer jy met ‘n trust? Is 'n meerderheidsbesluit dan geldig?
“Externally, trustees cannot disagree. In the external sphere the Trust functions by virtue of its resolutions, which have to be supported by the full complement of the Trust body.” (Direkte uittreksel uit die uitspraak hieronder.)
'n Onlangse uitspraak van die Appèlhof maan ons om versigtig te wees wanneer ons met trusts kontrakteer. Jou ooreenkomste met 'n trust sal ongeldig en onafdwingbaar wees as die trustees wat namens die trust opgetree het, nie behoorlik gemagtig was om die trust te bind nie.
Moet die aangestelde trustees dan altyd eenparige besluite neem om geldig te wees, of sal 'n meerderheidsbesluit van trustees wel voldoende wees? Die Appèlhof het hierdie vraag aangespreek in die konteks van 'n trust wat probeer ontkom het van die bepalings van 'n borgstelling, waartoe die trustees nie eenparig ooreengekom het nie en wat nie deur al drie trustees wat gesamentlik sou moes optree, onderteken is nie.
Wanneer 'n meerderheid besluit van trustees nie voldoende is nie.
- 'n Skuldeiser het 'n eiendomstrust gedagvaar vir betaling onder 'n borgstelling wat die trust aan hom verleen het. Die trust het die eis teengestaan en het aangevoer dat die borgstelling ongeldig was, omdat die resolusie wat aan die trustees magtiging sou verleen om die borgstelling te onderteken, nie deur al drie trustees gemagtig en onderteken was nie, maar slegs deur twee van hulle.
- Dit was inderdaad die geval. Net twee van die trustees het die trusteevergadering bygewoon waarop die borgstelling bespreek is. Die derde trustee was nie by die vergadering teenwoordig nie. Hy het nie die resolusie onderteken wat die borgstelling in beginsel gemagtig het nie en hy het ook nie die werklike borgstelling daarna onderteken nie.
- Die vergadering self was in orde, omdat die trustakte voorsiening gemaak het dat twee trustees 'n kworum vir vergaderings kon vorm. Maar die trustakte het ook voorsiening gemaak dat 'n eenparige besluit van die trustees vereis word vir die trust “om sake te doen namens en tot voordeel van die Trust, en om trusteiendom in sodanige besigheid aan te wend”.
- Die hof stel dit so "...trustees moet gesamentlik optree met hul besluitneming en resolusies tot voordeel van die Trust en die trust se begunstigdes, tensy 'n spesifieke meerderheidsklousule anders bepaal" en "Selfs wanneer die trustakte voorsiening maak vir 'n meerderheidsbesluit, moet die resolusies deur al die trustees onderteken word.” (Beklemtoning bygevoeg en vrylik vertaal.)
- Soos in 'n vroeëre hooggeregshofbeslissing uiteengesit: “Die meerderheid trustees mag intern 'n kworum vorm by 'n vergadering van die trust, maar dieselfde meerderheid van trustees kan steeds nie 'n trust ekstern bind deur saam op te tree nie ... Dit is nie die meerderheidstem nie, maar eerder die gesamentlike besluit deur die hele groep trustees wat die trust se sake en bates bind. ’n Trust werk op formele besluite (resolusies) en nie op stemme nie.” (Beklemtoning bygevoeg en vrylik vertaal.)
- Aangesien slegs twee van die drie trustees in hierdie geval namens die trust opgetree het, het die hof die besluit (“resolusies”) en die daaropvolgende borgstelling as ongeldig en onafdwingbaar bevind.
Wat beteken dit vir jou in die praktyk wanneer jy met 'n trust kontrakteer?
Interne trustaangeleenthede: Interne aangeleenthede (soos die aanwending van trustinkomste tot voordeel van begunstigdes of die administrasie van trustbates) “kan tussen die trustees gedebatteer en tot stemming gebring word, waarna die besluit van die meerderheid trustees uitgevoer moet word.”
Eksterne trustaangeleenthede: As 'n buitestander sal jou onderhandeling met die trust eerder verband hou met eksterne trustaangeleenthede (transaksies met betrekking tot trusteiendom met die buitewêreld soos die koop en verkoop van eiendom, die aangaan en ondertekening van borgstellings en so meer). Hier is eenstemmigheid tussen die trustees noodsaaklik vir die trust om gebonde te wees. Selfs wanneer die trustakte voorsiening maak vir besluite om by wyse van meerderheidsbesluit gemaak te word, moet al die trustees steeds aan die besluitnemingproses deelneem en moet al die trustees 'n besluit onderteken om dit ekstern geldig te maak. Maak dus seker dat alle trustees wat namens die trust ooreenkomste en dokumente onderteken, die magtiging het om dit te doen ingevolge die voorskrifte van die trustakte en deur 'n geldige, eenparige besluit.
Provided by B. R. Sandwith Inc.
© DotNews. All Rights Reserved.